Euskal Hedabideen Urtekaria 2021 argitaratu du Behategiak

2021 urteak digitala den hodeiertza utzi du agerian nabarmen, eta hori da aurtengo ale honetan gehien errepikatzen den ideietako bat, berrikuntzarako eta eraldaketarako beharrarekin batera.

Behategiko koordinatzaile den Libe Mimenza Castillok nazioarteko ekosistema mediatikoan dauden joera nagusiak aztertu ditu eta Hekimen elkarteko zuzendari den Igor Astibia Teiletxeak euskal hedabideen alorrean iazko urteak eman duenaren errepasoa eta aurrera begirako urratsak bildu ditu bere kronikan.

Gogoetari forma askeago batean bide emateko tarte berri bat dauka Urtekariak, aurten Joseba Sarrionandia Uribelarrearen eskutik. Nazioa komunikazio espazio moduan da bere artikuluaren izenburua eta arnas sakoneko saiakeraren lurraldean sartzen da autorea bertan.

Sektorean dihardutenen ahotik bost artikulu labur jasotzen ditu liburuak. Aiaraldea komunikabidearen garapen eta eraldaketa prozesua; Berria Ikasgela egitasmoa; Arrosa irrati sarearen hogei urteko ibilbidea; EITB Podkast ataria sortzeko prozesua; eta Garazi Goiaren Ikus-entzunezkoak, ikuspegi globaletik Euskal Herrira begirada hitzaldiaren laburpena. Hauekin batera, herri ekimenetik sortutako Pantailak Euskaraz taldearen ikuspegia dakarren artikulua ere badago.

Ikerketa lan luzeen ondorio diren artikuluen saila beste bost ekarpenek osatzen dute.

Edorta Arana Arrieta EHUko irakasle eta Applika+ Ikerketa Proiektuko ikerlariak, beste batzuekin batera, Euskal Herriko zenbait gazterekin osatutako ikerketa paneletik ondorioztatutakoak bildu ditu Ikusgarritasunaren erronka: fikziozko serieak gazteen artean artikuluan.

Elhuyar Fundazioko Adimen Artifiziala Hizkuntzan unitateko zuzendaria den Josu Aztiria Urtaranek Itzulpen automatikoa: euskara hutsezko hedabideetatik euskara ardatz duten proiektu komunikatibo eleaniztunetara lanean, dagoeneko gure artean dagoen itzulpen automatikoaren gaia sakon aztertzen du, eta gehigarri gisa, Elhuyar aldizkariko zuzendari den Aitziber Agirre Ruiz de Arkautek Zientzia.eus agerkari zientifikoa itzultzaile automatikoarekin sei hizkuntzatan argitaratzearen esperientzia kontatzen du.

Codesyntax enpresako Josu Azpillaga Labakak dakar Hekimen elkarteko hedabideen webguneek izan duten trafikoa eta bisita kopuruaren azterketa, bere urteroko audientzien irakurketarako artikuluan.

EHUko irakasle eta NOR Ikerketa Taldearen koordinatzaile den Josu Amezaga Albizuk Audientziak neurtzeko sistema: burutzeke dugun erronka lanean, egun oso hutsune handiak dituen euskal audientzien neurketa sistema baterako planteamendu sakona egiten du.

Amaitzeko, EHUko Emakumeen ikusgaitasuna hedabideetan Ikerketa Taldeko Arantza Gutierrez Paz eta Itxaso Fernandez Astobizak landutako Kazetaritza feminista Hego Euskal Herrian azterlana daukagu. Azken hamarkadetan sortu diren izaera anitzeko komunikazio-produktu feministak zerrendatu eta deskribatu dituzte bertan eta Euskal Hedabideen Behategiak lan hau baliatu du, bide batez, euskarazko komunikazio-produktu feministen datu-basea eraikitzeko eta hemendik aurrera osatzen joan ahal izango den direktorioa sareratzeko.